تعال لالا تغيب ابد هونك على قلبي شوي
دامك تغيب وماترد ليه الله يخليك لي
الشوق وينه والوعد والضحكة وخوفك علي
روحي وفارقها الجسد ميت ولكن فيك حي

والعين ماتلقى مثل حسنه ولايمكن لذا
مايشمله قول المثل الله عطا والله خذا
الله عطاه وجمله مايشبهه هذا وذا
ياليت ربي حلله لي دون هم ولا اذى

ياناعس الطرفين انا طايح وماسمي علي
كني مفارق لي ضنا ولا مفارق لي هلي
وين الهناء موتي دنا شفني بحبك مبتلي
لا والله الا ضامنا ذكر الزمان الاولي


زمان فات من السنين اليا لفت حزني لفى
ياويش اسوي بالحنين اللي بقلبي ماطفى
في ذمتي يامسلمين فيني بقايا هالوفاء
عيا يفارقني يمين الله دمع يذرفه

وجدي عليه ويابري حالي وياغبني عليه
وجه من الحيله بري تركني وانا اموت فيه
علق هواه بخاطري واقفى وخفاقي يبيه
ياشينها لامن طري في القلب ياحسبي عليه

شبيت في جوفي جمر شوق ومشاريه وغلا
ياعمري تأمرني امر لا قلت لا بقول لا
وان مر طارينا الامر طاري الزمان اللي خلا
لايمنعك منا ومر لاتبخل بكلمة هلا