وش تبين من المطر والغيم يا ضحكات خلي
من يشوفك شاف نوض البرق في عرض المخيله
زابن الصوت الرقيق وزابن الوجه المهلّي
لا تسيّل واديٍ مانيب متحرّي مسيله

امسك ايدي لين اجي كلي معك واروح كلي
واعتبرني تايهٍ في الدرب خلاك الدليه
انت لك رمش ليا منه ذبح عوّد يصلّي
والا انا مالي على شيٍ عطاك الله حيله

شايفٍ في عيونك الثنتين ترحالي وحلّي
وصامتٍ صمت الصبور اللي على جمر المليله
تشرق الشمس وتغيب الشمس وانا في محلّي
اتصبّر واعرف الغايه ولا اعرف الوسيله


من عذلني منك قلت الموت عنده جايزلي
وان بغى قتلي طعنت الروح لين أشفي غليله
فدوة الطرف الكحيل وفدوة الغمازه اللي
ضاميه من مبسمك ولا روت من سلسبيله

عن قبال يسرق الالباب مانيب امتخلّي
ناسل روحي على متنك مثل نسل الجديله
ان ضحكت تعلّم الازهار وشلون التجلّي
وان بكيت تساوي النفس العزيزه بالذليله

من عرفك وما قضى عمره طروب ومسفهلّي
من لقاك وما لقى الدنيا مثل وجهك جميله
منت بالظبي الجفول ومنت بالظبي المفلّي
الظبا ما تسجن العاشق ولا تخلي سبيله
لا تعلمني على فرق الغرور من التغلّي
العيوب اللي على غيرك عليك من الفضيله