يا وديع المحبه
الهجر ما نحبه
و انت للقلب طبه
زين ذيك الليالي

يوم كفي ب كفك
حسب شفي وشفك
ضف قلبي و اضفك
مانيب منك سالي

لين أوسد يميني
تشهد المسلميني
حتى لو ما تجيني
والله انك في بالي

لا تسافر تراني
يوم أشوفك ثواني
كن ربي عطاني
في حياتي مجالي

وكان حالت ظروفك
بين شوفي و شوفك
خلني وسط جوفك
و خلّ عنك التعالي

خلّ حسك قريّب
والله ماني بطيب
و إن نويت اتغيب
ينبري منك حالي


أنت مثل النسايم
سقت دهم الغمايم
لين صارت عمايم
فوق رووس الجبالي

وأنت في نظرتي لك
فارقٍ بين جيلك
ويش عاد احكي لك
أنت سر الجمالي

من جميع النواحي
أنت سيد الملاحي
كل عنقاء شناحي
فدوتك و الغوالي

جعلها نذر عينك
وأنت بيني و بينك
رغم زينك وشينك
قابلك يا حلالي

تبغي الصدق ولّا
من قبل لا تغلى
من تغلى يخلى
حتى لو كان غالي

شطر بيت يردد
و إن طريته تجدد
لا تحاول تصدد
من يمين وشمالي