من رياض المجد – خالد الفيصل

من رياض المجد لامجاد الكويت … من ثبات العلم للعلم الثبات

جيت أصافح بالتّهاني كل بيت … للشّهيد الخلد والحي الحياه

فوق غيمة شوق من أبها مشيت … من نداها فزّت الصّحرا نبات

سيّرتني نشوة الحب وسريت … للكويت الّلي هويت أكتب غناة

في غناتي للشّرف صوت وصيت … ومن غناتي يرفع الفارس حداة

وللكرامة عرضة في كل بيت … والسجايا بالشهامه نايفات

ياالكويت الّلي على الباغي عصيت … يوم بعض الرّبع ينسى المكرمات

يوم بان الغدر قلنا له خسيت … كل شيطان رجمناه بحصاه

دارت الدنيا عليهم واعتليت … وانهزم جيش النّفوس الخاينات

يالفهد عند الوعد قلت ووفيت … طاغيات الرّوس عادت صاغرات

مااختلفت ولاذخرت ولاشكيت … شامخ مثل الجبال الراسيات

دلّك الله يالسنافي واهتديت … والنّصر من عند رب الكاينات

مايغط الحق رجال بخيت … مانسينا يالكويت السابقات

يوم عز بدارنا حلو المبيت … إستضفتونا زمان النّايبات

لين ابو تركي ظهر من فوق هيت … واصطفق من نجد لجبال السّراه

يرفع القرآن والسيف الصليت … واسترد الحكم من عقب الفوات

ياالصّباح وياالسعودي لى انتخيت … عزوتك عنّاز راعي الطّايلات

ويالامير الّلي على العليا نشيت … جابر العثرات محمود الصفات

في بلادك كل تكريم لقيت … والنشامى ماكتفوا بالواجبات

بالكويت أعطاني الشعر وعطيت … وبالكويت الشعر له طعم وحلاة