مرحبا بك جيت وانا كنت جالس فيك افكر
كيف ماوقف وارحب بك بتقدير وحفاوه

مانسيتك يابعد عمري على شان اتذكر
فيه احد ينسى البراءه والبشاشه والنقاوه

تدري انه مستحيل انه ايتغير ويتنكر
اي واحد عاد باقي فيه شي من البداوه

داخلن بالله على روحك من الشيب المبكر
افزع ل قلبي وكانك تقدر تداويه داوه

انت مثل الحاجه اللي طاولت بال المفكر
حاجتن نسيانها يحتاج له صبر و قساوه


هل لا مريت في بالك ودق ولا تسكر
السوالف معك ياروحي لها عندي طراوه

الفواد الى تضايق و المزاج الى تعكر
مايطيب الا بوجه يقلب الدنيا رضاوه

كل ماتطري لي اسهر واتحمد واتشكر
ماسهرتك من فراغ وماعشقتك من فضاوه

بس حاول ياحبيبي كل ما جيت اتفكر
اتفكر واتبسم لي ولكن بالهداوه

انت وجهك فيه زين وفيه ملح وفيه سكر
وانا واحد يووه صعب انه يتحمل هالحلاوه