فمان الله يا نجد العذية والوعد بعدين
متى بعدين مدري بس خليني على ماني
‏مصير الوقت ينصف طيبينه والأمور تزين
‏وبرجع لك ليا زانت معي كان الله أحياني

‏فمان الله يـ القلب الحنون ويـ الجناب الزين
‏كثر ماحبكم يسكن معاليقي وجداني
فمان الله يازعجّول ذودٍ تاصل الخمسين
‏طفافيح البكار اللي عليها وسم جداني

بديت أخاف من فرقا تجي وتشتت الغالين
‏وأخاف أضيع من ظلم الزمن وأفارق إيّاني

تعيش بحسرتك لاصارت احلامك مع الماضين
‏مضت ، والذكريات تردها الك وانت متفاني

‏ياصدري لاتهزك عبره ترقل لها يومين
‏وانا ادري فيك تجحد عبرتك كله علشاني
لونّ القصد حاجة وقت والا ظرف والا دين
يهونها علي ويسدها الطارف من اخواني

ولكنّ المصيبة جرحي اللي له ثمان سنين
يعيش بداخلي غصبٍ علي ويموت فلساني
الآ ليت الضمير الحي ياخذ من دموع العين
ضريبة للخطاء اللي قد حصل من شخصي الثاتي