على كثر القصيد وكثر ماجاب الخيال أفكار
تعبت ومالقيت الا ثمان أشياء تشبه لك
نور الشمس، لون الغيم، طهر الماء، وصمت النار
لين الورد، فجر العيد، ملَك وانسان ياسهلك

اذا كان العنا رحله .. بأسميك آخر المشوار
واذا صارالبخل عمرالجزايل فاسمك المهلك
تجين أحلى من البشرى تغيبين وتشين الدار
هديه للزمن جيتي من الله عن طريق أهلك

صحيح المدح لويقدر يقوم بنفسه ويختار
غدا عبّاد شمس ٍ لا لمح زولك توجّه لك

ضيا تسعين شمسٍ وألف بدر ونجمتين كبار
آخاف اقول ظلك و أظلمك والعز كله لك

غيوض وما يغيض النرجس الا ضحكة النوار
وكل الجود لو يفنى فنا من زود حبه لك
ورثتي مجد ابوك وجاك منهو زبنة لمن جار
أبو خيرين .. دمّاح الخطا .. والعمر مده لك

وأنا وش عاد أقول ان صرت في وصف الغلا محتار
شعورٍ ماقدر ياصل سماك وقلت أزمّه لك
وعلى كثر القصيد وكثر ماقلنا من الأشعار
تعبت وما لقيت إلا سموّك بس تشبهلك