اكذب على نفسي ترى ماني بصادق في الغياب
ادور في دايرتك اللي مستحيل املّها
يازين لو كان العذر ماهو على قد العتاب
طال الغياب وصدتك ماقلبي بكفوً لها

ياطاهره مثل المطر .. ياشامخة مثل السحاب
ي اول دروبي في الهوى واجمل دروبي كلّها
مالك شبيه الا القمر بس القمر من يوم غاااب
وانا عيوني كل ليله والدموع تهلّها

انتي مقسّيك الخطا ولا مضيعك السراب؟!
ابي جوابك ولا انا كل الدروب ادلّها

اخطيت وادري واعتذر ويحق لك فتح الحساب
لكن غيابك مشكله مافيه شيء يحلّها

ياغايبه ماعلموك اني هنا ميت عذاب
وماعلموك ان خطوتي عجز الطريق يشلّها
ياقربك ويامبعدك لو بيننا شارع وباب
اروح وارجع وانتظر طلة وصال تطلّها

اراقب الشباك واقف وانتظر منك جواب
واقول راضي لو ماغير تمر والمح ظلّها
مكسور مثل الشايب اللي فاقدً عمر الشباب
محتاج فرحة يستعيد بها حياته كلّها