بسم من أظهر أسامة على جيش السُفيت ... سامع صوت بن متّى وهو في بطن حوت
أخرج من الميْت حيّ أخرج مْن الحيّ ميْت ... من جعل أرضاً ذلول وجعل أرضاً سبوت
بسمه المحي المميت ابتديت ايه ابتديت ... ابتديت اللي بديت وعطيت الصوت صوت
شيب عيني شيب عيني اجرحوني ما دريت ... اقعديني اقعديني اقعدي راسي يانوت

عن نبيّ الله بأدافع دفاع المستميت ... لين احقّق غاية القصد والاّ ارحب ياموت
لابن يعقوبٍ بروح بن حربانٍ فديت ... ويا عسى جلدي لطاهر قدم رجليه بوت
مثّلت (يسرا) زليخا بمسرح أوبريت ... وهيّ كان اولى بها أن تمثّل دختنوت
مثّلوها هي ويوسف مثل رميو وجُليت ... وبجلابيب الزنا لبّسوه جْبه وكوت

ونوت تسألني عقب كل هذا وش لقيت! ... وابتسمت شويْ وقلت اثر ما في الوقت قوت
يا فؤاد المستميت ان بكيت او ما بكيت ... العن آبو من على الضيم يرضيه السكوت
من لهب نار الرفيق انكويت ألا استويت ... طاح كرتي ويا كثر من لهم طاحت كروت
من وانا ورع ابو عشر وهمي كُمبليت ... امتطي ساقي مطيّة واهيم مع الخبوت

ما لعبت (عظيم ساري) ولا (بنت السبيت) ... همّي اكبر من دْوِرْتي على شلّة بلوت
عايش عيشة شقا لا فنيت ولا بقيت ... آتوسّد بطن كفّي واشوم من التخوت

بدويًّ قحّ من وين اعرف الإيْتِكيت ... حطّني الله عظم بحلوق أهل الجَبروت
طار نومي طار يا ضارب الطار وصحيت ... قم قبل يِرفع علينا شراع الجيْلبوت

ايه انا (ناصر) ولي في الملا صوت وصيت ... جت بي امّي في رمادة غضا في (حضرموت
وحْلِمت بي حلمٍ افزع (تهامة) بيت بيت ... وافرح مْن سبيع (علوى) مروبعْة البيوت
وجت سوابق قصّتي في كتاب (بْن السُكيت) ... واعقدوا لي سحرهم في خليّة عنكبوت
بقْدمي سبعة ملوك من الجنّ لو بغيت ... في مثل لمح البصر فُتّهم يا نوت فوت

أذّنوا لي في المساجد : وفيت ولا هفيت ... دون حقّك (ياليتيمة) بغى ناصر يموت
فترةٍ فيها احتويت (اليتيمة ) واحتميت ... لين حطّوا لي بلاهم عبيد الكَهَنوت
طوّعوا غيري وانا اللي لحالي بس عصيت ... لين ضيّع راعي (البوش) في قلبي خفوت
لين بعيوني سقوني من الخمرة (كميت) ... قد بغيت آموت لولا صلاتي والقنوت

حرّةٍ يجلب لحمها على سوق الكويت ... دونها الموت الحمر شاتني للناس شوت
واعتزيت بسبعة من جدودي وانتخيت ... قالوا:اثبت.قلت: افا,ما عقب هذي ثبوت
والله اني من رجال بعاليها عليت ... الكبيرين البخوت الوسيعين البشوت
قالو : اثبت ,حكم ربك كذا وش بك غديت؟ ... والدهر مرّ وحلو كالزهر علقم وتوت