أسعد الله مساك
يالعيون الرهيبة
جعل عمري فداك
فدوتك واهتني به

قلبي اللي هواك
حظه إنك نصيبه
باعهم واشتراك
ما يخلي حبيبه

هجرك لخلك مصيبة
لو نسيته ما نساك
حالتي دونك كئيبة
وانتظر ساعة لقاك

من جمالك يا عجيبة
قلبي خلاني وجاك
طاعتك ماهي غريبة
الغريبة لو عصاك

دون شك ودون ريبة
ما ملا عيني سواك
شفتي الأرض الرحيبة
ما تزين إلا معاك

فيك حنية وطيبة
والجمال اللي زهاك

برد غيرك ويش أبي به
دامني عشت بدفاك

نظرتك يا ملاك
لا نظرتي عجيبة
ورمش عينك هذاك
ويل منهو يصيبه

زاد ربي حلاك
بك فخامة وهيبة
انت محدٍ سواك
أعشقه واكتفي به

شعرك اللي فاح طيبه
يوم وقفتي هناك
حطنا بحالة صعيبة
وكل خلق الله وراك

ما أبي غيرك حبيبة
لأن محد بمستواك
هاك قلبي واعتني به
واعتقيه من الهلاك

دامك بجنبي قريبة
وانتي أدرى في غلاك
لو تخليني مصيبة
وانا ميت في هواك