اقبل الليل و المجروح روحه سرت
ما بعد نام يومك تحسب انه صحي

كان ودي مـ اقول ان غيبتك أثّرت
خابر الوضع قبل انك تغيب اريحي

خاطرٍ فيك ما يسمع و نفسٍ زرت
ما سمح يوم اقول اسمح و اقول اسمحي

راعني في شعوري و المشاعر طرت
الاحاسيس ما تحتاج رُسل و وحي

باعت الناس في ضميرها و اشترت
و انت شاريك ماني حاسبٍ مربحي

الهموم افضحتني و العيون استرت
الحزن ما يجيها الا لـ قلت افرحي

مثل دمعه على وجنة كريم احدرت
يستحي لا يبدّيها و ما تستحي


ما درا عن ظروفه يوم ربعه درت
كان عزمه يرد القوم ما ينتحي

الجروح القديمه عادها ما برت
كيف تبغى الجروح التاليه تنمحي

الأمل فيش يا أيامٍ بقت و صبرت
زيني شوي و ان زنتي شوي اجرحي

و انت يا حظي الهقوات فيك كبرت
بس يا نفسي ان قلت اطمحي فـ اطمحي

و القصيد اسمعتْه الناس و الا قرت
زان كان بها ما زان قلت ادمحي

المهم العيون اللي عليك سهرت
و المهم الشعور انه مهو مسرحي

و انت لا تشغلك الافكار لو كثرت
كيف انا ميت بـ حبك و ما زلت حي !