ليلةٍ ما بين مسفر وابن عمه مقيم ... العرب من هولها صلّوا المغرب عصَر
يا مِقِيْم ابسألك عن مُقيمٍ مستديم ... ما ذكر في يوم صلّى صلاته ما قصَر
ووش وزيرٍ فاق في سلطته سلطة زعيم؟ ... وهم رعايا الدولة الواحدة فيما ذُكِر
يا مقيم ابسألك راحلٍ والا مقي ... قال :ألا راحلٍ قلت: وان قلنا: صبَر

قال: ما باقِ ألا أنا قلت:وافهم يا فهيم ... قال: بإيدي لا بيدْ عمرو يا شاعر مُضَر
لي عن أهل الخيزرانة صراطٍ مستقيم ... قلت:برّ وقال: ألا بحر وامحق بحر
غصن زيتونٍ للاطيار من فوقه رنيم ... باترك الورقا تغنّي عليه :اسمر عبر
ولا تعيش الرمّة الا على الشيّ الرميم ... كالطيور اللي على اشكالها توقّع حدر

النوَر تشبه بعَض والطبايع (سيم سيم) ... ولو تغيّر اسمهم .. النوَر تبقى نوَر
ولو بهم واحد فقط من طبايعهم سليم ... كان ما صار اسمهم _عندأهل مصرٍ_غجر
احمد الله ضربتي ما تجي الا في الصميم ... وكلمتي وحده ولكنّها تسوى عشر
قلت:وسّع خاطرك خابرك دايم حليم ... ما تهزّك كلمةٍ جابها وجهٍ ودر

الحليم اليا سمع هرجةٍ جت من لئيم ... ابتسم .. وشلون أجل لا سمعها من بزر!!
انتبه تزعل . ترى أسعد أيام الخصيم ... يوم يلقى للزعل في وجِهْ خصمه أثَر
ب(جاه ربي) باطلبك ثمْ بجاه بن اليتيم ... قال كلا ألف في ألف كلا لا وزر
يا مقيم أرجوزة البغي مرتعها وخيم ... وقبّة الطغيان مهما علَت ترجع قبر

قال:سين (انت ابن من في الرجال) وقلت :جيم ... ( ابن من لا أنجبت حُرّةٍ مثله ذَكَر
لي من الأمجاد ما فاق آفاق السديم ... ولي من الطولات ما لا تطاولها بشر
قال:طيّب .وش تبي في شرابٍ من حميم؟ ... وكلّ قدٍّ من قبُل صار قدٍّ من دبُر
وش تبي في خمّةٍ سمّت الباشق .. عديم ... لا نخوا سلتوحهم جاك ما صدّق خبر

يا مقيم أدري بكلْ شيّ انا ماني غشيم ... وادري ان اسمي لهم صايرٍ علّة نحر
وادري اهل الكهف هم نفسهم أهل الرقيم ... بسّ مالي من ورا كشف عورتهم أجر
عورةٍ لو خيّطوا فوقها سلك البريم ... بيّنت كالشمس والساعة الوحدة ظهر
من دعى له والده بين زمزم والحطيم ... ما يهمّه سيل أهل الحسَد مهما كبر

ما انقطع لي في (هوازن) وصَلته في (تميم) ... ولا يموت احدٍ وله كاتبٍ ربي عمر
القهر ما هوب هذا .. ابك والله العظيم ... ما مثل قهر الرجُل من بني عمه قهر
كم ولدٍ عمٍّ لو آجيه ظميانٍ سقيم ... ما سقاني شَرْبَه ولو ترجّيته شهر
احمد اللي عزّني من وانا ورعٍ فطيم ... عن مثل هذا وعن كلّ مبدولٍ غبر

اقطع الفرجة لحالي مع الليل البهيم ... يوم ولد اللاش ما فاخت أمّه لو .. شبر
للهمم ربي خلَق _يوم يخلقها_ هميم ... وللقمم يصعد من القوم كلْ صاعد نظر
بالألف واللام والميم لي صوتٍ رخيم ... يوقظ النايم قبل يذّن المذّن فجر
شرهة (الروح بن مريم) على (موسى الكليم) ... والردى في أهل الردى لا تدوّر له عذر


حسبي الله في رجالٍ من الداخل حريم ... وضعها دايم خطيرٍ ولا منها خطَر
مثل ابو وجهين ما شفت في العالم عقيم ... لا انكشف أفلس من اثنينها بطن وظهر
يا كثر ما جنّةٍ في الأصل كانت جحيم ... وكم كسر ساقٍ إلى زاد عن حدّه جبر
ما لنا ألا الظاهر .. وبالخفايا الله عليم ... سنّة الله لين يذن حمارٍ في هجر

ويش ترجي من عتلٍّ بعَد ذلكْ زنيم ... ما يطيب ولو تشيله على متنك دهر
ووش لي بهماز لمّاز ماشٍ بالنميم ... مع كثر ما يسرح الصبح ما ضوّى بعَر
حالفٍ ما دام لي راسٍ يشمّ النسيم ... ما اتلحّق مقفيٍ لا بِ(خير) ولا بِ(شر
جاهلٍ من يحسب (القدس) هي نفس (أورشليم) ... كالسهل عكس الصعوبة وهو عكس الوعَر

هيه لو صيد (البواشق) مثل صيد (الظليم) ... شفت في (البومة) عوَض واحدٍ ضيّعْ (صقر
لا وسيم ألا وسيم السجايا يا وسيم ... والفقر فقر المراجل إلى قالوا فقر
والدميم الصدق ياللي تقولون الدميم ... واحدٍ يفخر بماضيه والحاضر (صفِر
مَن يزاعل صاحبه لجْل يِرْضي خشف ريم ... لا تثق به لو فرَش لك على السكّة زهر

ما انقطع رزقي ولي في السما ربٍّ كريم ... ولا يضيق بي الفضا ولي عيون ولي بصر
من أقام النار في يابس العشب الهشيم ... قادرٍ أن يخرج الماء من حصبا قفر
كيف نشحذ والسما غيمها من فوق دِيم ... عيب والله عيب والشمس ما معها قمر
ما يضيم بن آدمٍ مثل ضيم الحظّ ضيم ... من ردى حظه وهو ما بعد سار يْعَثُر

عزّتي للي سواتي على وجهه يهيم ... لا معه حظٍ يعينه ولا عنده ظهَر
قلت ما لا قاله العود (لقمان الحكيم) ... بالشعر .. بسّ أنّ حظي صفق بي في حجَر
وغيري اليا قال كلمة ولو هي حلم نيم ... اكتبوا له من عظيم الثناء مْيَةْ سطر
ورغم هذا ما تشائمت والحادث جسيم ... في رجا نصرٍ من الله ولا غيره نصر

من (خميس مشيط) ثمْ من (تبوكٍ) في (القصيم) ... يا كثر ما طال ليلي عليّه يا كثر
غربةٍ تحت السما .. غربةٍ تحت الأديم ... غربتين ما لابن آدمٍ منها مفر
ما نوفّي ربع معروف عارف يا مقيم ... خلّ عاد إني اجحده والوفا عوده خضر
قد حفظنا حقّ جربوع في العصر القديم ... فكيف ما نحفظ لذي الحقّ حقّه يا بشر

ديننا في صْحِيبنا ذلك الدين القويم ... ما نجي مع غِرّته يوم ولد اللاش غِر
ربّنا لأهل الوفا حطّنا جنّة نعيم ... وللردى واهل الردى حطّنا موتٍ حمر
بسمك اللهم ذي الطَوْل رحمنٍ رحيم ... لا تخيب واحدٍ طقّ لك بإيده صدر
طالبك يالله في كلّ شيطانٍ رجيم ... منه لا تبقي عليها جنود ولا تَذَر

يالله انك لا تخلّي على الدنيا ذميم ... ويالله أنك تلعن اللي إلى قفّى غدر
يا مقيم اليا اجتمعنا نديمٍ مع نديم ... مَن بظنك يربح .. ومَن بظنك بِيْخَسَر
وجاه من أحيى بِ(غَيْمٍ) ومن أهلك بِ(غيم) ... غير ركعة تالي الليل ما شيٍّ يسُرّ
في نهارٍ ساعته مالها حدٍّ و قيْم ... لا انتصب منها صراطٍ على حفرة سقَر
لا نجى ساق السليم وزلَق ساق الأثيم ... يا جنانٍ خضر يا ذات ألواح ودُسُر