كيف أطفي الريح بثيابك وكيف أشعلك
كيف اتثر على جمرك وكيف احتويك
نقّضت ليل الحرير وجيت منت لهلك
سميت باللي فتني بك وجيت ابتديك

هذا اول الدرب اوهذا الطريق اولك
جيت اتوقا عذابات المدى واهتديك
شوقي مسافة وهمساتك مدار وفلك
ان ماضميتك غلا ياعلني ما ارتويك

ايه اعرفك واعرف اني من غلاك اجهلك
مرات اضمك واخاف اني مشبّه عليك
مرات اشوفك بنفس الوقت واتخيلك

وانشد كفوفي عن اخر سالفة من ايديك

واعن لك لو تصب الموت واتهيا لك
واجوع لك واتمنى خنجرك واشتهيك
ماقلتلك عمر سيف العشق مايقتلك
ماتشوفني حي قدامك وانا اموت فيك

اشتقت لك قبل اجيك وجيت واشتقت لك
البارحة طول ليلي بين هاذي وذيك
مليت جمر انتظارك واستحيت اسالك
واحسبني ما بعد جيت وفكرت اجيك
أثرك بقلبي من البارح وأنا استعجلك
وأثري نسيتك من الفرحة وقمت أحتريك