سبحان من يرزق بتوع الملاين ... الرازق اللي ما يخيب الرجا به

لي عم عنده معرضٍ للصوالين ... أموت واعرف بس من وين جابه

وإذا سألته قال بعت الدكاكين ... ما يدري إني ما هضمت الإجابة

الحاصل إني رحت له قبل يومين ... في قصره العامر ودقيت بابه

قلت الصراحة طالبٍ قرب غالين ... ودي تزوجني كريمتك يابه

ثنّى وقال اهلين والله وسهلين ... والكون ترخص لجل عينك رقابه

قال أولاً مهر العروسة ثمانين ... غير الرسوم وغير حق العصابه

والثانية عمك يبي منك سبعين ... رسم الأبوّة والنسب والقرابه

وام العروسة حقها منك ستين ... عشانها ست الحسن والمهابه

واخوانها كلن يبي منك خمسين ... عداً ونقداً تندرج في حسابه

وخواتها الخمس اعطهن من ثلاثين ... عشان تتوثق عروق النسابه

وتجيب طقم عيار واحد وعشرين ... وخاتم من الماس المصفى ترابه

وموتر بسواقه وفيلا بدورين ... أثاثها من بطرته ينحكابه

واحجز بها قاعة بقصر السلاطين ... واحجز بها رقاصتين وربابه

قلت اذكر الله يا عدو المساكين ... واستغفره لا يبتليك بعذابه

الظاهر إنك منت عارف أنا مين ... أنا لو ارقا فوق متن السحابه

ما جبت حتى نص درزن مواعين ... واضحك بكيفك واعتبرها دعابه

قال انت لو فكرت تفكير صاحين ... ما شفت في مجمل شروطي غرابه

حنا بعصر العولمة والمزاين ... ماهوب عصر الفلسفة والخطابه

الناس تسعى للرتب والنياشين ... وانت اهتمامك بالشعر والكتابه

والشعر ما ينفعك لو هو دواوين ... ما دام جيبك مثل بيت الخرابه

يا بوك لا تسمع كلام المصاخيط ... واسأل مجرب عاش في وسط غابه

قلت الله اكبر يا محرر فلسطين ... من يسمعك يحسبك ذيب الذيابه

تراك شايب راس مالك ريالين ... والبنت ما تسوى جناح الذبابه

قال انقلع مالت على وجهك الشين ... لا عاد اشوفك عندنا يالزلابه

قلت ابشر ابشر لكن الباب من وين ... واقفيت من عنده على صوت بابه