قرّر التاجر يكون الشاعر الأول ... افرحوا يا اهل القصيد وجهزّوا الساحة

سهلّوا الأوزان لجل المبدع الأفضل ... بعد إرهاق العمل يحتاج له راحة

فاضي هو يوزن ؟ .. كلامه كامل مكمّل ... يكفي انّه لجلنا يكتب عن جراحه

الكسر فاسماعكم وإدراككم يجهل ... عبقرية فرحته والفن في نواحه

جدّدي له يا صحافة عهدك الأمثل ... وارسمي الأشعار صحرا وشعره الواحة

واكتبي عنه العظيم الشامل الأشمل ... كان يحتاج الشعر جهده واصلاحه

واسألي كيف ومتى وهل كان أو يعقل ... عمرنا من غير فكره تكمل افراحه ؟

وين " نوبل " عن قلم من أشرق واشعل ... ظلمةٍ كنّا بها أفناها مصباحه

من يقول ان الشعر في وقتنا مبهذل ... سعرنا عقب الخساير زادت ارباحه

لحّنوا الشعر البديع الأصعب الأسهل ... واعرضوه بكل شاشة ليل واصباحه

وادفعوا للي شدا للشاعر الأجزل ... مبلغ وقدره " كذا " يستاهل صياحه

ابشروا يا مطربين الدفتر الأجمل ... يكفي عن مُرّ السؤال وذل إلحاحه

دفترٍ فيه القصايد تشتري الأخطل ... وعنتر يضحّي بعبله ويرمي سلاحه

دفترٍ فيه المعاني في اليمين اسفل ... أقوى أبياته : فقط لا غيري في الساحه