غن ياصوت المحاني على لحن الغرام
هيضتني نبرة الحزن من عزاف ناي
ترجم احساسي محبّه وشرهه واحترام
يوم انا يمنعني اسمي ويمنعني حياي

ياوسيع الحلم لاضاقت صدور الانام
رحمتك هي راس مالي وعفوك مبتغاي
دلني لاتاهت اخطاي في وسط الزحام
واعفني من ضيقة الصدر لاتبحث خفاي

السهر يستدرج العين في جنح الظلام
والهموم تحاصر القلب وتزوّد عناي
وديّ احيي بهجة الحلم واعطيه اهتمام
بس انا ماشفت شيء يناسب مستواي


وانت ياللي من عرفتك على نفس النظام
تهتني في داي ويضيق صدرك من دواي
رافعٍ كفّ الموادع على كفّ السلام
اتقدم لك على الدرب وتعوّد وراي

ياسراب منك ضامي معاليقي حيام
لايفارق شوف عيني ولا يقطع ظماي
لو تقدّر مايجيني من اسباب الهيام
كان عشت اللي بقى من حياتك في رجاي

من يسكر باب الاعذار في وجيه الكرام
يعتبر من صدة الرايح اللي كان جاي
كلنا نخطي على طول مافيها كلام
بس انا لاخطيت جيت اعتذرلك عن خطاي
لاتحملني مشاريه وعتاب وملام
حط نفسك في مكاني وتدري وش بلاي