اعتذر ماني مثل ما كنت لك ملهوف
ماتت الاشواق فيني كيف تحييها
خاطري ضايق على نكرانك المعروف
نادمٍ لايّام صبرٍ طافت ابكيها

للقهر فيني مواري واضحه للشوف
قد كرهت امحبّتك من شين طاريها
تدري انّي مغرم و تلعب على المكشوف
والمشاعر عاد فيها ما يكفّيها

كيف تنسى عشرة اللقيا و ضمّ اكفوف
ما نسيت أيامنا لو كنت ناسيها
ما هنيت الا لشوفك بالهنا محفوف
من غلاك اشفق على روحك واداريها


آتجاهل بُعد و صدّك عساك اتروف
وانت في دنياك لاهي دالهٍ فيها
يا سبب كل الجروح و دمعي المذروف
شاف حالي قاصي الشمّت و دانيها

لو تظنّ ان المحبّه قافيه و احروف
شوفني اكتب قصايد فيك وارميها
يا معذرب فالأمان و ملتجي بالخوف
قصّةٍ تضحك و تبكي عين قاريها

مشكله لا كان هجرك ما حصل لظْروف
لا تكحّل عين عذرك زود تعميها
عزلتي ارحم و لاني بالوهَم مشغوف
عزلتي من بعد هجرك صرت شاريها