ركضت بزحمة هالدنيا ادور خاتمة لكتاب
ابنهي قصة الوحدة أحد أطول حكاياتي
وانا اعرف البشر فيهم خبيث وطيب ولعاب
انا ما ابي احد منهم يزود من معاناتي
ابي اعشق مثل غيري أبي اهنا ولا أرتاب
أبي انهي ألم خوفي وبطرد ظل مأساتي

ابي اغفى صدر يطمن قلبي المنصاب
أبي حب يدفيني ويرسم ابتساماتي
ابي من يمسح دموعي اذا ضاقت بي الأسباب
أبي رأيٍ يرسّيني اذا غصت بمتاهاتي

أبي انه ما يخليني اذا خلوني الأحباب
أبي أصدق بشر يوفي لو رحت لمسافاتي

بديت اسأل عن أحلامي لقيت قبالي الأبواب
اخاف ادخل ولا اطلع واغرق في خطيئاتي
صحيح ان القدر واحد لكن النصيب أسباب
أبي أسعى لغاياتي وخايف من نهاياتي

صمعت انه محد فيهم صدوق وكلهم كذاب
ولكن رغبتي تفرق أشجع احتمالاتي
لعلي أسعد وأهنا والاقي خاتمة لكتاب
كتاب داخله يحكي أحد اطول حكاياتي