دليل المحبه شوف عيني عليك تغار
و لا ودي الحاسد عيونك يطالعها
مع إنك رحلت بعيد لكن بقى التذكار
لياشافته عيني تسابق مدامعها

دفنت الغرام بخافقي والقلوب أسرار
مشاعر هقيت إن الليالي تضيعها
فرحت برجوعك ماطلبت لخطاك اعذار
و نفسي نست عن ما جرى من تواضعها

تهادت مشاعر خاطري لك بلا معيار
تجاهلتها لو كنت خابر دوافعها
يقولون جنّب درب مالك معه معبار
يلومون نفسٍ بعد الأحباب موجعها

يقولونها قبلي يخون البحر بحّار

والآمواج لا هاجت خذت ماتبي معها
تكاثرت منك الصد وأثر العلوم كبار
لقيتك على نفسي تقلّب مواجعها

غرامك مثل نارٍ حطبها الغلا و النار
تموت و غلاك اللي بقلبي يولعها
غلاك بضميري واضحٍ ما عليه غبار
تشيل الغلا نفسي وأنا عاجز امنعها

يقولون ما اودعّك: قلت الفراق وصار
والإنسان روحه تنسلب مايودعها !
هذيك الليالي وين ؟ و أثر الزمن دوار
خذاها ولا ظني زماني يرجّعها
طوتها السنين ولا بقى لي سوى التذكار
ليا شافته عيني تسابق مدامعها