لاماتمون تمون في حقك قليل
انته على ماتطلبه تامر امر

ليل الشتاء ياليل منته اي ليل
صبابة المشتاق في ليلك خطر

لامالت الذكرى على الضلع النحيل
يمكن مع الأيام تحدث به كسر

يامرحبا ياتوق منسوع الجديل
اقلط معي نسهر على ضوء السمر

ليل الشتاء والنار مع بن وهيل
مع جمعة الاصحاب والقمرا بدر

في موقع رائع مع الجو العليل
تل وغدير وشوق الاحباب وقمر

وتعانق القمرا بعض سحب النسيل
في ليلة قمرا على رجوى مطر

وعلى الثرى متشابك من كل جيل
ورد ورحيق ازهار وازهار وثمر


اشياء تذكرني بوصفك ياجميل
لاشفتها تطري على بالي كثر

ياللي خذيت القلب والشوق البديل
سويت بي مالا يسويه الكفر

انته مع كل البشر مالك مثيل
مالك مثيل في بدو والا حضر

يابوجبين مثل براق المخيل
ياجامع المتناقضه ثلج وجمر

يامالك من خلقتك طرف كحيل
انت الذي قلبي معك طول العمر

لك مستعد اقطع فجوج المستحيل
لو كان في دربي وقف ليث ونمر

اكتب لك اشواقي مع الشكر الجزيل
على شعور زارني والك الشكر

لاماتمون تمون في حقك قليل
انته على ماتطلبه تامر امر