ابا اعزي الدموع اللي غشت خدي عقب فرقاك
واداوي نزف جرح ٍ سال دمه من شرايني
واعز النفس عن حبك مدام اني عجزت القاك
تعبت من الصبر واتعبت من كثر السهر عيني

تعبت استعطفك وارجيك وامشي في سبيل ارضاك
تلعبي على كيفك تبعدني وتدنيني
تحملتك وانا صابر وادور لك عذر لخطاك
ولكن ما نفع صبري معك واليوم يكفيني

خلاص اليوم قررت انسحب من دنيتك واسلاك
ابرحل ما التفت لو صاح لي صوتك يناديني
ابرحل للبعيد اللي ينسيني اسى ذكراك
وبترك كل شي منك لا شفته يبكيني


وبخفي عنك وين ارحل ولا تسأل علي انهاك
اذا قادك فضولك يوم انسى انك تلاقيني
بعوض ما مظالي من سنين ٍ عشتها وياك
كفى ما ضاع من شانك من احلى واجمل سنيني

ابركب مركبي وابحر وادور لي بدل مرفاك
شواطيك الكئيبه حطمت كل الأمل فيني
بكن الهم في صدري واسافر للبعيد هناك
عسى الأيام والغربه من إجروحك تداويني

صحيح بغربتي بتعب ولكن في سبيل انساك
بعزي بالصبر نفسي ولو محدِ يعزيني
نعم مليت نكران الجميل وطبعك ومبداك
وقلت البعد عنك ارحم مدامك ترفض تجيني