يا ظالم قلبي – مزعل فرحان
يا ظالمٍ قلبي تنوم الليالي
ما حاربت عينك ابد لذة النوم
مرتاح بالك طول الأيام سالي
تنوم و عينك ما جفاها الكرى يوم
أيامك أعيادٍ كساها الجمالي
خالي الذهن عن هم الأيام محروم
ما أنت بمثلي رابط الضيم حالي
حبله متينٍ مستوي فيه محكوم
همي رفيقي صايرٍ لي ظلالي
ما فارق عيوني ابد دايم الدوم
ما مر يومٍ مهتني فيه بالي
الظلم عذبني و أنا منه مضيوم
يعزف مراسيم الشقا في خيالي
لو كنت نايم وقظتني من النوم
يبست معاليق الحشا عزتالي
تشبه عذوق التمر لا صار مصروم
لو اشرح اللي يا جماعه جرالي
منه يشيب الطفل لو كان مفطوم
ذي حالتي الله عليمٍ بحالي
اللي ظلمني حبه اليوم مكتوم
يا ممرضٍ قلبي تنوم الليالي
ما حاربت عينك أبد لذة النوم
مرتاح بالك طول الأيام سالي
تنوم و عينك ما جفاها الكرى يوم
لا يوجد تعليقات حالياً