ياوجودي وجد من خاب ظنه فاصدقاه
وحملنه سود الايام مالا يستطيع
وجد عودٍ مايبي احدٍ يقصر في الصلاة
وكبروا عياله وصدوا عن الطاعه جميع

من هواجيسٍ تكدر علي صفو الحياه
ضيقت صدري وانا قبلها صدري وسيع
أحمل أحلام المشاهير وافكار الدهاه
لين سوت بينها حلف في راسٍ شجيع


ان بدعت الشعر لازم تناقله الرواه
وان هبطت السوق مالد عيني في الرجيع
وان حصل عند العرب في المواقيف اشتباه
ترجح اثقال الموازين في اليوم الشنيع

يا هني اللي ليا من بغى شي لقاه
ما تنطحته صدوف الدهر مع كل ريع
وانا عمري ضاع من دون تحديد اتجاه
كلما جيت اسلك الدرب قلت اخاف اضيع