حزني ما يموت ما يجف يا سيدي نهر المدامع
حزني ما يموت حتى لو عن مأتمك يمنعني مانع
دام حبك بالدم كل شي يحيي امحرم
يا حسين

لو خلت من وجه ناعيها المنابر
جفني يصنع منبر

ولو سكت صوت المواعظ بالحناجر
يقرا صوت المنحر

مأتمك ديني وحياة أحزاني عاشر
يعني لازم أحضر

عهدي: كلما أنمنع، أنصب شعائر
لكن ابلون آخر

نبرة الخطيب منحر ومن حادي يقرا لي النواعي
نبرة الخطيب ونه تسمعها أحاسيس افتجاعي
لو خله كل مأتم كل شي يحيي امحرم
يا حسين

إلمرتبط باسمك على ذكرك يواظب
أنت طهر النيه

ولو عن الموكب يكون ابجسمه غايب
يبتكر لطميه

هذا حالي ابقلبي محفوره المصايب
عايش الهم بيه

لطمي نبضي ويحتشد دمي مواكب
تندبك يوميه

لو صحت حسين دمي جاوبني حسين ابكل وفاءه
لو صحت حسين مستهله وهذه لطمية عزاءه
أنت بالحال أعلم كل شي يحيي امحرم
يا حسين

ريشة إحساسي يلونها هيامي
ابلون من دم طفك

ترسمك حامل طفل بين المرامي
تحضنه ابكل عطفك


هذه لوحه بيها يتشكل ضرامي
وللوجود اتعرفك

يعني يا ناس انذبح عبدالله ظامي
ودمه صابغ چفك

صورة الرضيع والسهم لونه دما بوريده ساجد
صورة الرضيع عالجريمه والقساوه تبقى شاهد
فكري لأجلك مرسم كل شي يحيي امحرم
يا حسين

لو ضريحك ما قدرت أمشي وأزوره
ابموكب المشايه

اقرا عاشوراء او دمعي ايبث شعوره
كربلاءك غايه

من أسلم اسمي يتسجل حضوره
ايشارك الوفايه

أعتبر جفني الصحن والقبه صوره
وايدي صارت رايه

أرفع السلام يا إمامي من بعيد وهذا كافي
أرفع السلام وآنه اعرفك حاشا ما تكتبني جافي
حس ضميري اتكلم كل شي يحيي امحرم
يا حسين

لو إجه الموت وخلص بالدنيه عمري
حزني يذكر همك

من إمامك لو يسئلوني في قبري
لازم أنطق اسمك

حسين إمامي لو قلتها العبره تجري
وبيه أشعر سهمك

حتى موتي ما هو مانع وأنت تدري
قلبي عاش ايخدمك

ساعة الحساب فاطمه اعلى امصيبتك تنصب عزيه
ساعة الحساب حزني يرجع ينعى قتلى الغاضريه
بالمعاد الأعظم كل شي يحيي امحرم
يا حسين