من يشبهك يالفارقة عن كل زين
وإنت اللي حسنك بالمفيد المختصر
نوعه كثر ما نادر و راقي و ثمين
ممكن تراه العين مره في العمر

من يشبهك يا هند أو من تشبهين
لو كل تشبيه في مثلك يفتخر
إن قلت ياشمس أو قمر في الحالتين
يا حي فيك الشمس ويا حي القمر

من رقتك يا هند والطبع الرزين
سحر الخجل زادك مع الهيبة سفر

في طلتك هاللي كثر ما فيها لين
كنك من الضي إنخلقتي والزهر

ملامحك فتنة وكلما تضحكين
في مبسمك حول البرد يضوي جمر
وعيناك ما مر الشعر شرواها عين
قصيدتين أبلغ من أوصاف الشعر

ولو تسألين الناس أنا أشباهي وين
بتجاوبك يا هند ما مثلك بشر
و من يشبهك لو هو سؤال بكلمتين
ما لك شبه هذا الجواب المختصر