مملوحةَ الفال بنت رجال و اشرافي
معشوقةَ الطيب و أصل الطيب خادمها
بين البلادين يزهى سِترها الضافي
كريمةَ المدّ ما تحصى مكارمها

السحاب اللي عشق وجه الشمال
بالزباره حطّت المزنَ الرِحال
للوفى للصدق في وعد الرجال
شامخٍ بالعز يا ذاك الثرى

و انتحى وجه السحايب للغروب
للعطا لدْخان عشاق و قلوب

للجبال السمر هبّي يا الهبوب
للكرم للجود يا برقٍ سرى

و للجنوب اللي خذا وعد السحاب
و للعِديد اللي لبس بيض الثياب
نخوةٍ تزهى على ذاك التراب
صانها الأجداد في عهدٍ جرى

و للشروق اللي خذا منّا وعد
دوحة الأمجاد و القايد حمد
للوطن لك يا قطر منّا عهد
للإمام إنسير ما نرجع ورى