بشدّ لمشرق الشمس .. و بعلّق فوقها ديوان ... أمانه لا وصلتي مغرب الشمس .. انثري قافي

أنا بلسان نجد أرسل .. قصيدة شوق .. من ولهان ... على زهور النفل ريح الخزامى .. تنّده الغافي

تنهّد بالقصيد طويق .. سالت دمعة الصمان ... من أنفاس القصيدة .. انصرم طلع النخل صافي

نختني للقصيد أرضٍ .. من الوادي .. إلى بابان ... ثراها يشربك حبٍ .. و لا يرواك يا وافي

ألا يا شيخنا حبك .. عليّ الله من الإيمان ... ما دام انت الوطن و الدار .. ستر العاري الحافي

غلاك اللي شرب كل الجوارح .. لين صار احسان ... غديت من الغلا ملجأ .. لمن حبك معه خافي

لنابك هيبةٍ تفرح صديق .. و تجرح العدوان ... و لك منا رجال تعد .. موتٍ دونك انصافي

تعلمنا المراجل منك .. لك بالمرجلة نندان ... و لا نلحق معك .. ما يلحق الإعصار مع سافي

كملت إلا أن عذروبك بشر .. و عن البشر شتان ... تطيح و تمترض .. ليتك مخلد دوم متعافي

سبقني للقصايد فيك .. من روس العرب اخوان ... و لي بين الشموس .. سراج .. خوفي كيف ينشافي

و إذا كلٍ سبقني مدح .. اسمح لي بوصف انسان ... حنونٍ في ضلوعه .. قلب طفل .. بحس شفافي

تقل شمسٍ إلى من .. بان بسمه يرجح الميزان ... و كل الخلق عقب الشيخ .. سرج بعضها طافي

ألا يا أميرنا .. هنّ بسلامة حالك الخلان ... فلا قبلك مريض .. يهني الزوار و اللافي

سِلِم .. من يوجع اقدامه .. و لا توجعه في ميدان ... سلم .. من له دعينا الله .. رد الشيخ يا شافي

سلم .. من نار عينه تمن أهل الدار .. و الجيران ... سلم .. من ضحكته تودع مريضٍ ميسٍ شافي

سلم .. من طوّع الشمس الشرود .. و عنها بعنان ... تعلق في معارفها .. و يمم راس مشرافي

إلى قالوا مريض قل .. مريض اللي فقد سلطان ... و إلى قالوا بعيدٍ قل .. قريب الهمّ لسنافي

نخيت الشعر .. أوصف وش تحس الناس لكحيلان ... و إذا خان الشعر شاعر .. عسى يكون الغلا كافي