في سوالف عيونك للمحبة دليل
والمشاعر بحبك ماعليها كلام
الغلا له زمن فيني يحط ويشيل
والسهر من لياليه صرت اعاف المنام

طال دربك وانا دربي ثقيل وطويل
بين وقت انتظار وبين شوق وهيام
مابقا فيني من الصبر كود القليل
المسامع ظوامي والنواظر حيام

وماكسرني سوا حزني بوقت الرحيل
وماجبرني عليك الا جنون الغرام
لو ظمنت اني القا عقب حبك بديل
كان خليت ليلك والسهر والخصام

لا تخيلت وصفك قلت صبرن جميل
ولاطرت لي عيونك قلت عمري حطام
فارع الطول ، ناعس عين خصرك نحيل

مايس القد ، سيد البيض بدر التمام

ما لوصفك شبيه ومالحسنك مثيل
القصايد توقف للجمال احترام
وكان قلبك من الفرقا كسير وعليل
لاتشح بوصالك ويعداك الملام

حط لي عن شموس الوقت عندك مقيل
وخلني في حياتك ذو قدر واهتمام
اقترب واخذني ياجعل عمرك طويل
الليالي بلا وصلك عليها السلام

من يداويك ياجرح بقلبي يسيل
ومن يسيّلك ياوبل المطر والغمام
وكيف ابحييك ياحلم الغرام القتيل؟
ومن يطفيك ياجمر العتب والخصام؟
ليت عقب العطا رديت ربع الجميل
وليت عقب البطا ماصار حبك كلام