يا نجمة الصبح امانه لا تخليني
باسهر معك لين يشرق صبحنا الثاني
واقولك كان لا قلتلك توحيني
واعلمك وش سبب حزني وحرماني
يانجمة الصبح بعيونك تشوفيني
بين علي السهر ومتعب اجفاني
سود الليالي بسهرها كحلّت عيني
وليا سرا الليل مع مسراه سراني
واتلى ليالي تضحكني وتبكيني
واللي يضحكني امس اليوم بكاني
ياعين كفي .. ومافيني يكفيني
ليش البكا .. والبكا ما عالج اشجاني
تعبت ادور على شين ينسيني
ولا لقيت العوض في اعز خلاني
احبها حب متعبني ومشقيني
وحبّي لها حب ابوي لعرق جداني

كانت ليا كثرت احزاني تسليني
وتزعل الناس والدنيا على شاني
وكنت استلذ الزعل من شان ترضيني
وكانت تحب القصيد وتعشق ألحاني
واليوم راحت .. وضاق المجتمع فيني
وراح الفرح مع وطنها وغادر اوطاني
لي ذكرياتن مضت من ماضي سنيني
تنطق بها العين لو ماينطق لساني
ما انسى كلامن تقوله لي تحاكيني
لو منت خلي حسبتك ثالث اخواني
راحت وقفت .. عقب وقفت توصيني
واوعدتها بالوصل كان الله احياني
يانجمة الصبح مدري وش معنّيني
ضاعت حياتي مع اللوعه وحرماني
يا نجمة الصبح انا ضايع ودلّيني
واخذيني لعالم ٍ ينسيني احزاني