على طاري الفراق اللي .. طرالي بسيرتك الحين
وعلى طاري الجروح اللي طرت لي وجيت في بالي
دخيل الله هالطاري .. طلع لي فيك بس منين
دخيل الله مو وقته .. وانا تعبان في حالي

انا من وين ابدي لك معاك وابتدي من وين؟
تبي ابدي من اول جرح او العاشر او التالي
بصراحه ما توقعتك .. تحطم قلبي المسكين
ولا حتى توقعتك تدفعني الثمن غالي

معك قلبي قضى عمره على النيه عمر وسنين
وانا ما غير اتأمل .. على الله ترأف بحالي
معك أوضح من الواضح .. ولا ألعب على الحبلين
وأنا هذا الأمر قبل أرفضه..ما مر في بالي

قبل ما كنت تلقاني اذا ناديت امد ايدين
لأنك تدري الطيبه بقلبي اردى افعالي

تخيل كنت أتأمل تجي وتسأل علي بعدين
لأني قلت بغيابك .. فال الله ولا فالي

وغلاتي عندك انك ما تخبي بخاطرك أمرين
طلبتك واللي يرحم والدينك قول يالغالي
الأول تكفى علمني و ش اللي بخاطرك واثنين
من اللي أشغلك عني وأشغل قلبك وبالي

وأحس بصدمتي سكين ...ياعمي اي سكين
احس بضيقه الدنيا تضيق بضيقة احوالي
بعد ما شفت صدماتي على الدنيا من الغالين
بديت الحين اتوقع تجي الصدمه من ظلالي

على طاري الفراق اللي .. طرالي بسيرتك الحين
وعلى طاري الجروح اللي طرت لي وجيت في بالي
دخيل الله هالطاري .. طلع لي فيك بس منين
دخيل الله مو وقته .. وانا تعبان في حالي