طمنوا ستي ام عطا – تميم مريد البرغوثي
طمنوا ستي ام عطا بإنه القضية ... من زمان المندوب وهي زي ما هية
لسة بنفاصل القناصل عليها ... زي ما بتفاصلي ع الملوخية
لكن اطمني وصلنا معاهم ... بين ستة وستة ونص في المية
بطلع لهم يا ستي حيفا ويافا ... ولنا خرفيش وسيسعة برية
ولنا دولة يحرسها طير السنونو ... يا ام عطا ولبسوه رتب عسكرية
والسنونو إله نمو اقتصادي ... والسنونو إله خطط أمنية
والسنونو عم ينبذ العنف ويعلن ... إلتزامه الكامل بالاتفاقية
ولنا برضه يا ستي سجادة حمرا ... تالسنونو يأدي عليها التحية
والنا قمة يدعو إليها السنونو ... يعقدوها في الجامعة العربية
حيوا برج الحمام وحيوا حمامه ... من ملوك المحبة والأخوية
يا حمام البروج ويا موالينا ... يا دوا الجرح ويا شفا البردية
يا شداد الخطر على أعادينا ... وحبكو إلنا حب قيس للعامرية
راح أقول اللي قالوا طوقان قبلي ... أخو فدوى وبن الأصول الزكية
في يدينا بقية من بلادٍ ... فاستريحوا كي لا تضيع البقية
لا يوجد تعليقات حالياً