يا قرص شمس ما لهش قبة سما – صلاح جاهين

يا قرص شمس ما لهش قبة سما يا ورد من غير أرض شب و نما يا أي معني جميل سمعنا عليه الخلق ليه عايشين حياه مؤلمة عجبي

ينبوع و في الحواديت أنا سمعت عنه – صلاح جاهين

ينبوع و في الحواديت أنا سمعت عنه إنه عجيب .. و ف وسط لهاليب لكنه شقيت كما الفرسان طريقي .. لقيت حتي الخنازير و الكلاب شربوا منه عجبي

انا كل يوم أسمع فلان عذبوه – صلاح جاهين

انا كل يوم أسمع …….. فلان عذبوه أسرح في بغداد و الجزاير واتوه ما أعجبش م اللي يطيق بجسمه العذاب و اعجب من اللي يطيق يعذب أخوه عجبي

على رجلي دم نظرت له ما احتملت – صلاح جاهين

علي رجلي دم .. نظرت له ما احتملت علي إيدي دم.. سألت ليه ؟ لم وصلت علي كتفي دم.. و حتي علي رأسي دم أنا كلي دم .. قتلت ؟ ….. والا اتقتلت عجبي

نوح راح لحاله و الطوفان استمر – صلاح جاهين

نوح راح لحاله والطوفان استمر مركبنا تايهه ولسه مش لاقيه بر اه م الطوفان واهين عليك يا بر ازاي تقدر تبان والدنيا غرقانه شر عجبي

ورا كل شباك ألف عين مفتوحين – صلاح جاهين

ورا كل شباك ألف عين مفتوحين و انا وانتي ماشيين يا غرامي الحزين لو التصقنا نموت بضربة حجر و لو افترقنا نموت متحسرين عجبي

سهير ليالي و ياما لفيت و طفت – صلاح جاهين

سهير ليالي و ياما لفيت و طفت و ف ليه راجع في الضلام قمت شفت الخوف … كأنه كلب سد الطريق و كنت عاوز أقتله .. بس خفت عجبي

رقبه قزازة وقلبي فيها انحشر – صلاح جاهين

رقبه قزازة و قلبي فيها انحشر شربت كاس و اتنين و خامس عشر صاحبت ناس م الخمرة تصبح وحوش و صاحبت ناس م الخمرة تصبح بشر عجبي

عجبتني كلمة من كلام الورق – صلاح جاهين

عجبتني كلمة من كلام الورق النور شرق من بين حروفها و برق حبيت أشيلها ف قلبي .. قالت حرام ده أنا كل قلب دخلت فيه اتحرق عجبي

كان فيه زمان سحليه طول فرسخين – صلاح جاهين

كان فيه زمان سحليه طول فرسخين كهفين عيونها و خشمها بربخين ماتت لكين الرعب لم عمره مات مع إنه فات بدل التاريخ تاريخين عجبي

أحب أعيش ولو في الغابات – صلاح جاهين

أحب أعيش ولو في الغابات أصحي كما ولدتني أمي و ابات طائر .. حوان.. حشرة .. بشر ..بس أعيش محلا الحياة.. حتي في هيئة نبات عجبي

يا باب يا مقفول إمتى الدخول – صلاح جاهين

يا باب يا مقفول … إمتى الدخول صبرت ياما و اللي يصبر ينول دقيت سنين … و الرد يرجع لي : مين ؟ لو كنت عارف مين أنا كنت أقول عجبي

أنا شاب لكن عمري ألف عام – صلاح جاهين

أنا شاب لكن عمري ألف عام وحيد لكن بين ضلوعي زحام خايف و لكن خوفي مني أنا أخرس و لكن قلبي مليان كلام عجبي

و الكون ده كيف موجود من غير حدود – صلاح جاهين

و الكون ده كيف موجود من غير حدود و فيه عقارب ليه و تعابين ودود عالم مجرب فات و قال سلامات ده ياما فيه سؤالات من غير ردود عجبي

ياما صادفت صحاب و ما صاحبتهمش – صلاح جاهين

ياما صادفت صحاب و ما صاحبتهمش و كاسات خمور و شراب و ما شربتهمش أندم علي الفرص اللي انا سبتهم و الا علي الفرص اللي ما سبتهمش عجبي

ضريح رخام فيه السعيد اندفن – صلاح جاهين

ضريح رخام فيه السعيد اندفن و حفره فيها الشريد من غير كفن مريت عليهم .. قلت يا للعجب لاتنين ريحتهم لها نفس العفن عجبي

خرج ابن آدم من العدم قلت : ياه – صلاح جاهين

خرج ابن آدم من العدم قلت : ياه رجع ابن آدم للعدم قلت : ياه تراب بيحيا … وحي بيصير تراب الأصل هو الموت و الا الحياه ؟ عجبي