تروي علي بشويش يم العيون الحور
عساني فدى نظرتك ماني فدى غيرك

على حسنك الطاغي على رمشك المغرور
انا راضي بشرك وانا راضي بخيرك

اذا اقبلتي بزينك تصيب الرقاب كسور
ياسبحان من صورك واحسن بتصويرك

حضورك اذا جيتي ساكن بلحضور حضور
تسلطنتي بزينك وعقلك وتفكيرك

تري وجنتك كنها شعاع على البلور
وانا الهايم الي صاير تحت تأثيرك

على غصنك الوارق يغني مية عصفور

يا حظ الغصون اللي تجمع عصافيرك

جمالك طبيعي ماهو مجمل بديكور
تباهي وحسادك وتقوي بتصغيرك

تفرعن جمالك فوق كل النساء البدور
عليك الله اكبر مابقى شي يثيرك

مباهير زينك تشبه اللولو المنثور
وانا عارف قهوتك واعرف مباهيرك

خجولة طبايع ما تعرف الكذب والزور
هذا اللي رفعك وزاد قدرك وتقديرك

حوالينك اببني واشيد عليك السور
وعن نظرة المذهول ودي بتسويرك