تجيني يختلف حالي
وأحس الوقت في صفي
كأن الوقت يضحك لي
بعد ما كان مشقيني
تجيني وكل ما فيني
على جيّتك متحفّي
كأني متّ بغيابك
وجيت اليوم تحييني

أنا باقي لي شويه
وآلاقي بغيبتك حتفي
ترى حالي صعب دونك
ولا غيرك بيغنيني
عجز بالي أبد يهدا
ولا عيني قوت تغفي
تعبت أداري بدونك
دموعٍ ما جفت عيني


أنا لا شفتك قبالي
توقف دمعي ونزفي
واحس ان نظرة عيونك
عن العالم تودّيني
واتوه وما احس الا
حدود الكون هو سقفي
واطير من الفرح كني
ملكت الكون بيديني

تجيني واشكرك واشعر
بـ "شكراً" معك ما توفٌي
أنا ممنون لك ياللي
عن العالم مكفّيني
حبيبي لو بقول إني
أحبك ما هي تكفي
ولا هي كلمةٍ توصف
شعورٍ لك سكن فيني