أنت لي عن ضجة الوحدة سكون
أشعر أنك بي ولو مبعد مداك

وأنت لي عن فتنة الدنيا عيون
ما جذبها شوفة إنسانٍ سواك

شافتك روحي قبل شوف العيون
وابتدت ترسم ملامحك وحلاك

أدري أنك همت بي لين الجنون
وأدري أن الروح تتنفس هواك

لو خذاك البعد معذور وتمون
أدري إنه غصب عن قلبك خذاك

من عرفتك وأنت ما تعرف تخون

من عرفتك ما عرفت إلا وفاك

نظرة الحساد وعيون الظنون
لو تناظر فوق ما توصل سماك

نورك اللي يهدي الأيام لون
والقمر يسفر ظلامه من ضياك

ما جفيتك لو جفا الطير الغصون
وأنت راس المال والعاذل فداك

لندن ابلقياك يا القلب الحنون
يحتويها السعد في لحظة لقاك

إن ضحكتي كل جرحٍ فيني يهون
وإن زعلتي تزعل الدنيا معاك