جعل زوله ما يفارقني ثواني
جعل روحه ما تشوف الشر داني
ذا كلام الصدق من قلبي ولساني
والمحبة وصل والفرقا قطاعة

يا نسيم الليل وش بينك وبيني
كل ماهبيت زاد الشوق فيني
للحبيب اللي مُنى قلبي وعيني
كل يوم وكل ليل وكل ساعة

جادلٍ من زينها كل الصبايا
لا احضرت تاقف وتعطيها تحايا
والنسب عالي ومن روس دهايا
وامرها نافذ وله سمعٍ وطاعه

ويش اوصف ويش اقول ويش اخلي
آيةٍ من شافها عقله يولّي
وان حكت كنك من السكر تحلي
وغيرها في البيض مالي به طماعه


طول عنق وعين فيها البرق لايح
والنحر فارع وفيه الورد فايح
والشعر ليلٍ على الامتان سايح
وابرك الحزات هي وقت اجتماعه

جعل زوله ما يفارقني ثواني
جعل روحه ما تشوف الشر داني
ذا كلام الصدق من قلبي ولساني
والمحبة وصل والفرقا قطاعة

ايه احبه وش علي لا قلتها له
امتلكني بالغلا وكلي حلاله
ومن زعل يزعل ويا جعله فدى له
هو مدار الكون عندي واتساعه

ودام انا واياه في حب وتعاهد
لا يحاول غيره بوصلي يجاهد
الغلا والحب له والقلب شاهد
شاهد انه ماخذٍ روحي وداعه