يقول من عدى على روس الطوال النايفات ... من ضيقةٍ فالصدر كانيها وحزتها عصير

يالله يا اعظم من الاسما واجل من الصفات ... يالله يالله يا غفور ويا سميع ويا بصير

يا رب اجرني من عذاب القبر ما بعد الممات ... واغفر لابي وابيه واخوانه واجرهم يا مجير

يا ربنا عبدك واشيل من الذنوب الكايدات ... ما لاتشيل الارض والدنيا رحاها مستدير

ياربنا عبدٍ خلقته من تراب وطيب ذات ... ونفخة فيه الروح وانت اللي على ذلك قدير

يا ربنا ما خترت اكون الشاعر اللي قاسيات ... الطرق يطرقها وتصبح له ارق من الحرير

انت الذي خلقت كائن حي غير الكائنات ... الحمد لك والشكر والمنه وفضل الله كثير

ياربنا شاعر واهيم بكل وادي من شتات ... واقول مالاافعل وانا مؤمن ولي قلب وضمير

شاعر ويتبعني من الغاوين كثر الغاويات ... اذنب بهم وان غرروبي صرت اقل من الغرير

والشعر مثل السيف ابو حدين وعين البنات ... يا ليتها كانت مدى الشاعر ومرساه الاخير

ماكان جبت العيد والعذر البنات المترفات ... والعالم الله وش نوى قلب المقدي للضرير

البارحه هبت علي الريح من كل الجهات ... حتى عرفت ان الليالي غير والوقفات غير

وقمت اتلفت فالسنين اللي غدت مني فوات ... وامنت بان العمر مهما طال بالدنيا قصير

كلن يموت وينتهي والوقت يمضي هات هات ... ولا عاد يبقى الا الذكر ان كان شر او كان خير

والشاعر ابقى بعد موته بالعلوم الطيبات ... او عكسها والوقت ياخذ والقصايد تستخير

اقرب دليل اللي لهم فالبيت سبع معلقات ... راحوا ولا زالت قصايدهم كما البدر المنير

الاعشى وعمرو وطرفه بن العبد والعبسي ثبات ... والنابغه وبن ربيعه وبن ابي سلمى زهير

والشعر فضل شاعره عمن سواه وله سمات ... فضل ابو الطيب وهو سقى وابي فْراس امير

والشعر مهما فضل الشاعر مقام ودرجات ... ما فضله بالفعل في اليوم العبوس القمطرير

اقولها وانا اعرف انها ما تلحفني العباة ... اللي طرفها في يدي واكمامها في ايد الوزير

لكن على الله يا متم الصوم ومقيم الصلاة ... تدفى الكفوف الباردات ويجبر العظم الكسير

يا صاحبي يا حظي المكتوب يا اغلى الامنيات ... يا اجمل الصدفات لو ما جات يالسهل العسير

من صيف عامه ما خذاني عنك بعد ولا سكات ... وانت اتجاهلني واناوضعي من اسبابك خطير

والحب ذنب ما يكفره التجاهل والسكات ... واجه فديتك واحسم الموقف يصير اللي يصير

ولا تعلقني على امل نجوم ٍ ساريات ... وابقى على قول البدو لولا الامل مات الفقير

يا صاحبي يا اغلى السنين الماضيه والمقبلات ... يا اعز واغلى من على الدنيا برجلينه يسير

لا تحسب اني جاهل ٍ بعض الامور الخافيات ... اللي تحدك وانت مالك من مخاليبي مطير

ادري واقدر واتحمل واتحاشى الانفلات ... والاتراني في بعض الاحيان ما اطيع الشوير

والصبر مفتاح الفرج والقل جراح اللهات ... وسهيل يبدي في السماء ويهيج فالقاع البعير

وانا من اللي مجدهم على ظهور المسرجات ... قوم ٍ ماهي بتشد لا جاها من القوم النذير

وشعادني حيٍ ٍ على شانه وشلي فالحياة ... ان كاني لاسرجتها ما افرق الجمع الغفير

لعيون من حبه رسى مرسى الجبال الراسيات ... وليا اصطفق ما كنه الموج في البحر الغزير