نهايتَكْ ماهي فراق..
نهايتَكْ شيّ غير..

نهايتَكْ..هذا العناق ..
هذا العناق الأخير ..

ضم قلبك لقلبك..
واذرف اغلى دموع..

فوق جثمان حبك..
واطفِ وهم الشموع..

ضم وقتٍ فات حينه..
ضم أوهام امنياتك.
وكل خيبة داخلك كانت دفينة..

خذ بكا العمر وأنينه..
خذ من اشهى ذكرياتَكْ ..
زاد يضمن رحلتَكْ تبقى حزينة..

والقي النظرة الأخيرة..
على رفات حْكايتَكْ ..

مافي هذا الأمر خيرة..
بْيبقى الأسى فِمْرايتَكْ..
وحسرتك في الضّلوع ..
ويستحيل الرجوع..
لْما قبل هذا العناق..
هذا العناق الأخير..

ربّما هذا الغرام..
كان أجمل من دوامَه..

ربّما لو هو استدام
كان ما خُلّد ختامه..

ربمّا صار اعتيادْ..
وانطفت جذوة ضرامه..

ربمّا بالإزدياد..
ينقص الأمر بتمامَه..

ربما في الأمر خيرة..
آه لو يشفي الكلام..
مافي هذا الأمر خيرة..
بيبقى الأسى فمرايتَك..


وصورة النظرة الأخيرة..
على رفات حْكايتَك..
وحسرتَك في الضلوع ..
ويستحيل الرجوع ..
لْما قبل ذاك العناق..
ذاك العناق الأخير

اقفل ابواب اللي فات..
واذكر انّك كنت مُكرَهْ..

لجل تلقى في الشتات..
شي تحيا له في بُكْرَهْ..

عيش جمّع في شظايا..
ماتناثر من بقايا..
من شعورَك .. من خيالَك

من مواجِعْك الكثيرة..
ماهو لجل تحب غيره..
هذا فوق اقصى احتمالَك..

لجل تقدر يوم تكتب..
ما يسكّن هم عاشق..
أهلكه معشار حزنَك..

لجل تقدر يوم تكذب..
وتمتلي باحساس واثق..
انك انت اخترت سجنَك..

وان ماضيك اختيارَك..
وانك اخترت احتضارَك..بامتثال
وانك اخترت اختصارَك..في سؤال

وش وصّل الحب الكبير..
الى العناق الأخير..

مافي هذا الأمر خيرة..
بيبقى الأسى فمرايتَك..

وصورة النظرة الأخيرة..
على رفات حكايتَك..
وحسرتَك في الضلوع ..
ويستحيل الرجوع ..
لْما قبل ذاك العناق..
ذاك العناق الأخير