اسمع الشعر الحقيقي من مغنه
لا يضيع شاعرك زهرة شبابه
ايه احبك وادري ان الحب سنّه
قد لعب في الانبياء قبل الصحابه

في حرم وجهك سيوفٍ مستسنّه
خايف ازعّلك وتقوم الحرابه
من غمره رضاك رضي الله عنّه
لو علق بين التمادي والذرابه

يدغم الشاعر عليك بدون غنّه
شيٍ يحيّر فلاسفة الكتابة
في الشتاء البارد وعندك بوخ كنّه
لالفح في المتزن يفقد صوابه

وان قدرت اقول زينك ويش كنّه؟
كنّي ارد المطر صوب السحابه

كل ما عينت وصف وجيت اعنّه
ضعت بين الفوضويه والرتابه

ماخذ تاج الجمال انسه وجنه
مالهم في حقك الشرعي طلابه
بايعٍ عمري لـ ابو زمّه وبنّه
كل ما شفته مجرّحته ثيابه

انت حلمٍ قد مليت الكف منّه
واحمد الله واشكره من يوم جابه
وجهك مقابله لطفٍ في محنه
يا حياة القلب مدري يا عذابه

يقرع فوادي عليك اقراع شنّه
وانبرى حالي مثل قوس الربابه
اعطني قلبك وقلبي لا تحنّه
الظبا ما تاكل قلوب الذيابه