الصبر سجن الرجاء وسلومي قيود
واخاف لا أجني من الصمت الندامه
ساكت وصابر واشوف الوضع مشدود
ما ودي اجرح بأحاسيسي صيامه

من محجر الشح طاحت دمعة الجود
حتى غشت وجه الايام الملامه
بالضبط ما كأنها الا دمعة العود
عود من عياله يشوف انهزامه

كم واحد لو حضر ماهوب موجود
ندرك وجوده ليا اوحينا كلامه
وانا احسب ان الغياب سهود ومهود
لو كنت اميز حلاله من حرامه

ويوم افترقنا الضحى يا أعز مفقود
حسيت بالكون يوم اسدل ظلامه
بري وبحري ونسمة بارد النود
وسماي فاقدك غمامه غمامه

سحاب لكن بدون بروق ورعود
عجزت اواسيه حتى بابتسامه
والونه اللي تغيب شهور وتعود
صرت اتمنى لها طيب الاقامه

جاء للمشاعر ما جاء لأصحاب الاخدود
شكراً لظلمك على حسن اهتمامه
اللوم شيخ وراه جروحي وفود
ان مد يمناه عزالله مقامه

ووفاي مثل الشجر واوراقه عهود
حطي على غصن شوقي يا حمامه
ارجي وسلك الحرير يقودني قود

قود الزعيم لمقاليد الزعامه

لو ان حيلي من اللي شلت مهدود
ما اطيق ازيد الحمل ريشة نعامه
ان كان هذا الامل ما جاب مردود
قامت على راس عاشقك القيامه

يخسر تعب ه السنين وكل مجهود
وتأخذه عن راحة البال الشهامه
من عاش سكرة كلام عيونك السود
اصبح من العالم اصحاب الفخامه

كنه ملك والعرب من حوله جنود
بعذره ان عاش جوه وانسجامه
غيرك لو انه فرش فدروبي وروود
وفرض قبل مقدريته احترامه

اقول له ما على مشاعرك زود
لكن خلك على فراش الكرامه
اما انت والا بلاش معاشر الخود
ماني مبدل شدادي بالمسامه

مواصلك لا ذكرته يا اطرق العود
اقول يا جعل للجنه عظامه
سافرت مانت ب على سفرتك محدود
متى على الله ترجع بالسلامه