حبيبي يا جمالٍ فيه آموت ولو بغيت آموت ... وقف من دون موتي موتٍ أحيا ميّتي حيّه
آبذبح كاهن البصرة واعيد أسطورة الطاغوت ... آبي ادوّر على كلّي وراء بعضي وخافيّه
إلى من فوق كتّان السماء ترسم سراب بيوت ... لها تحت الثرى مني خيوط الوجد تبريّة
إلى أرضٍ دونها الخطوة على باب الجحيم تفوت ... إلى أرضٍ دونها فاح الدخان وصاح جنيّه

إلى عزّي إلى ذلّي إلى الجنّة إلى التابوت ... إلى بعدٍ يسوقه وجه قربٍ نيّته نيّة
حبيبي لا تعاتبني وانا باقي بقايا قوت ... على ما كان كان وكان شرقيّه وغربيّه
لو اطلب عنبرة من ظبي والا مسكةٍ من حوت ... على الحظ القوي سهلة لو الأوضاع عكسيّة
حبيبي عمر كاس المُرّ ما يصبح زجاجة توت ... وانا حظّي على الدنيا سحابٍ خان شاويّه

حبيبي كلنا ظلٍّ سنا شمسه ظلال بشوت ... تموت الفين مرّة فيّةٍ في فيّها فيّه
وانا عن حرب شطرنجي نظمت إلياذة البالوت ... هربت من الحقايق في سراديبٍ خياليّة
هربت سْوات من بالنار للأقدام حطّ سْبوت ... هربت اطرد زماني باقي شماغٍ وطاقيّة
لك الله ما تشوف ان هامتي تكبر وانا هلفوت ... وتصغر لا عصبت الراس قلت أخّو الفلانيّة

حبيبي كلّ ذيبٍ عاش عن شيٍّ مضى كتكوت ... تراه اللي يصيد الصيد يوم الصيد عصريّة

حبيبي ليه اعارض ؟ ليه افاوض؟ ليه أجرّ الصوت؟ ... وليه ابحثْ ورا قصرٍ من المرجان حريّة
مدام انّي بصمتي لابسٍ ديباجة الياقوت ... وصعب الناس مثل الخاتم المحكوم بيديّه
أبي ارمي باقي الأوراق واعطي الوقت بالشلّوت ... تعبت ارقى تعبت انزل أبي كيّة وانا كيّة

عجزت القى دوا للي معي لو هو سحر هاروت ... وانا دمّي لمن مثلي مثل دمّ البرازيّة
يقول اللي يقوله شيخ انا والا بعد سربوت ... عوايد ساكن الفوقي يشوف الناس تحتيّة
(سكودٍ) في فضاه مروّعه قبل أمس (باتريوت) ... ولا به شيّ من لا شيْ وبسر الناضجة نيّة
للا داوود,طالوتٍ توطّى صابره جالوت ... ورا طالوت يجحدها؟ يطالوتٍ مهي هيّه

وبعَد داوود يستاهل ولو طالوت شاته شوت ... رضى بالأجنبي شيخٍ وعيّا عن بنااخيّه
ومن يرضى بنفسه في يَدٍ إلا يده ريموت ... يراها ناس صحبة بسْ نراها حِنْ عبوديّة
أنا في وجه ربي من خِدَام الهيكل المنحوت ... ومن قنبر بني بربر ومن كفٍّ وكوفيّة
ومن طلسام سحر العبد الأدريسي وأبو نبّوت ... ومن عبّادة العُزّى ومن شامة وشوميّة

دعوته بالفلق تعويذةٍ مِن مَن خلق في (كوت) ... ومن أهل الحسد واللي لوت بين العقد ليّه
أزال الجُبت واحيا النبت حامي حوتةٍ من حوت ... إلاهاً لا سواه المنزل آي (الحمد) مكيّة
حبيبي لا تلوم الميْت فوق أرضٍ حقيقة موت ... ولُمْ من مات فوق ارضٍ حقيقة أرضها حيّة