نوٍّ رهش لي موحشٍٍ مرهٍش جِِِِش ... هتّاش عتّاش ورشّاش طشّاش
ناشي من المنشا يشادي لياارهش ... جيوش حبشيٍّ على الشرق نطّاش
شهلال شهلوله على القاع الى رش ... شهلال شلفٍ في النخاشيش هتّاش
رشّ مطشّ هايشٍ شايشٍ وش ... جيّاش نوّه بالقناطيش طوّاش

ينشر نواشيره على هشهشٍ نش ... يغشاه من قشع الشخاتير غوّاش
يرهش ويربش يوم قش الشجر قش ... قلب الشجاع اللي تنغمش تنغماش
كن راعده لاجهش شجاعّ تشوبش ... قام ايتخطرش دون الاشهب تخطراش
يحي هشيمٍ عقب شوف اربع كش ... وينعش نشاش مشلهب عقب الانشاش

نوٍّ بشوش يوم جرّش وبرّش ... يشفي بشوفه بوش بدوانٍ اعطاش
طرش على عشب الشمال ايتجهّش ... قام ايتخطّش شوك شبكه تخطّاش
شوف الشمطري والشجر منبته هش ... شفّي وشفّ امنشنشٍ حالته ماش
والشف الاول شوف غرو تقروش ... غرو هبشني هبش حب بمهباش

البارحة كني على ريش الاريش ... من شان شيٍ بالحشا يجهش جْهاش
همٍ حشا حشّي يحش الحشا حش ... حشّة حشيش غطرشوا به على طاش
فيا شوع قلبي شوع طيرٍ على عش ... اخذ فرخه وخرفش على العد خرفاش
فيا نشّتي نشّة خلوجٍ تنشنش ... شالوا ضناها وهي تشوفه يعمّاش


لاشرقوها شرق شام تنقرش ... قامت تشمشم من شذا الريح مهناش
هي شومها شومي على ناقل الغش ... راع الجديل اللي تعكرش تعكراش
ابو ثليل فوق متنه تعكرش ... شملول شهلول برد وابله طاش
وابو خدود مرهشات هملّش ... لا شال برقعهن تقل شعّة فلاش

يا ما عليهنّه شجاعٍ تطربش ... اصفى من الياقوت وابيض من الشاش
صدر من الشيراز كاسيه رشرش ... نور من البلّور كاسيه رشراش
ابو ثمان كنها الطش والرش ... هشّ هشاهيشٍ تبهّش تبهّاش
كن ريقهن در البكار الحبشبش ... ولا حليب ناشع فيه خشخاش

مزيون من شر العيون يتخشّش ... على مشفشف شفّته جاني خْراش
ياشبه خشف ذيّروه المخرّش ... كنّه يحوشه عن شبا الريع حوّاش
خشف عفيف الشان حرّك وتبلش ... عوده ليا هب الشمال ارعش ارعاش
عليه لا جاء من يمين آتدروش ... وعليه لا جاء من شمال ارهش رْهاش

مانيب مربوشٍ ولا نيب هشهش ... ولا شاربٍ غرشا ولا نيب حشّاش
لا شك شوقي شقّ الاجياب واربش ... واصبحت مربوش على كور مرباش
يالايمي في حبّه اش اش ثمّ اش ... لابو هشاش المرجلة لابو قطّاش