الي رواني من غلاه ورويته
حتى على روحي وقلبي أبدّيه
لنّه بوسط القلب بنيان بيته
مُحال غيره باب قلبي يخطّيه

قطعت له وعر الدروب ونصيته
عاني وحَل القلب في راحة ايديه
غرٍّ صفى لي بالهوى واصطفيته
يامر و ينهي و كل أمره ألبّيه

ما في البدو مخلوق مثله رأيته
و لا في المدن مثله بعد مَر طاريه
لو شافه الجاهل نسى جاهليته
و لا ظنّي العاقل بقى عقل يطريه


الجاذبيّه كلها جاذبيته
تحفه عسى ربي لقلبي يخليه
يسحرني بزينه وطيبه فديته
وفديت موطى رجله اللي وطى فيه

أهداني الدنيا بكف وهديته
روحٍ تنادي به و قلبٍ يناديه
إذا ظما من فيض روحي رويته
واذا ظميت ادنى على القلب يرويه

يالله عساني في العمر لا خليته
أعيش بين ايده امحقِّق أمانيه
صرح الهوى ويّاه فوق اعتليته
إيديه في إيدي نعلّي مبانيه