ياصاحبي ماتهون وصاحبك مايهان
انا تراني على هقوتك واللي تبي

الحب بلوى هم من هموم الزمان
لكن عليك بكلام الله وهدي النبي

لا تقول حظك من القمة نزل فالطمان
واقول لك مايقدر زادي ومشربي

دخلت قبلك مراحل متعبة وامتحان
صقلت مافادني حرصي وكثري اتعبي

اداحم الوقت الامحق بالجنوب المتان
الين ضعفت عزومي وارتخى منكبي

اقوم قومة جمل واطيح طيحة حصان
وابقى على مذهبي مايختلف مذهبي

اموت واحيا واهاجر من مكان لمكان
اليا تذكرت عشقي الاول ومطلبي

مطنوخة الزين كله والدلع والحنان
الغادة اللي سبت فكري وعقلي سبي

من زينها الطاغي يغارون كل الزيان

العنق عنق المها والعين عين الظبي

موتٍ حمر وان تثنّت كأنها الخيزران
الحكي حكي عربي والدم دم عربي

سحر البيان اشهد انها صدق سحر البيان
ماهوب سحر البراقع واللثم والعبي

فتحت قلبي لها صادق بكل امتنان
قلت اقلطي يابعدهم كلهم وارحبي

قالت ابي منك امان وقلت كلي امان
انتِ فأمان الله وفي وجهي وفي اشنبي

عشنا سوا ثم راحت كأن م شي كان
قامت عيوني وراسي شاب وانا صبي

حبيتها الضحلك اللي خل عشري ثمان
ضيع علي راس مالي من قبل مكسبي

تجارب الحب والله ماعليها ضمان
ان كان تمشي مشي وان كان تحبي حبي

الحب يبغى ذكى ولا فصاحة لسان
وياما ذكي حب واصبح بعد حبه غبي