الجادل اللي علمتني ويش معنى الاحتياج
باموت وانا احب طاريها واحب اوصالها
على مفارقها يضيق الكون وتثور العجاج
واليا اقبلت كن المطر وصيّ على استقبالها

والله ما أبي لي مال فالدنيا ولا نجمه وتاج
يكفيني ليا شفت حرف اسمي على سلسالها
من فاز فيها والله انه ما يفكر فالزواج
هذي خلقها الله ما ياخذ غيرها رجالها

حتى ولو خلت تعاملها على حسب المزاج
من حقها واهم حاجه ما تضيق بالها

تخطي ولاعندي عليها لا اعتراض ولا احتجاج
مهوب انا اللي يجزي السيه بعشر امثالها

ما قلت انا اللي خاطره كسره مثل كسر الزجاج
اقول انا ابرك للحمول الكايده واشتالها
من حبها خلتني اسوي دراسات ونتاج
تسرح وتمرح في خيالي كل يوم لحالها

بيني وبين اهل الدواء الشعبي تخالف واندماج
أعقد حبال المشكله وارجع وأفل حبالها
مهوب شرط الحبة السوداء يجي فيها علاج
انا تراني ما ذبحني غير حبة خالها