مرايات والصورة عكس الصورة
عمري في المرايات
وسنين جوّه صورة
وشريط ذكريات

بشكلك الملخبط
وعقلك لما خطط
يتنطط قلبك يزقطط
لما قالتلك حبيبي
أحلامك مش مقاسك
لأ دي أكبر نمرتين تلاتة
عكس اتجاهك
ماشي وانت مش خايف كالعادة
مجنون معجون بمية العفاريت محبوس
مستنني لحظة حظ ينفتح فيها الفانوس
ايام ما كنت تقدر
تنام ٨ ساعات
وتعدي ليلة كاملة
من غير ما تشوف كابوس

كابوس
اسمه الفلوس
عمال يدوس
ياما فرّق حبايب

وياما غير نفوس
خلاك تشوف للدنيا وش مش عامل حسابه
والواقع غصب عنك بقى يقرا لك من كتابه

حياة تفاوضك تساومك وشيء في شيء
تحاوطك تمضيك تنازل عن كل شيء
ما خطرش يوم في بالك
إن الفراق ده فرض
وان الزمن ها يدلق
أحلام كتير ع الأرض

في الأرض لفيت ودورت شرق وغرب
والقلب بيقول امتى هنرتاح يارب
غمضت عينك فتحت لقيت الشعر شاب
فجأة لقيتك
في اخر صفحة في الكتاب
يا ايها الولد
ما بقاش فاضل كتير
لو ده اللقى الأخير
أشوفك وشك بخير
هيوحشني لقاك
لو بعد ميت سنة
خد بالك من حبايبك
وأولهم أنا