في وهم حبك – سعد جمعة

في وهم حبك لي زمانين مخدوع .. قضيتها واليوم شفت الحقيقة

كشفت سرك وانكشف كل موضوع .. كشفت ماتخفيه وسط الوثيقة

عرفت قصدك واصبح القلب مطبوع .. من يمكم قفل منافذ مضيقه

حب معك من بدة الناس مرفوع .. اقولها من قلب ما هي بضيقة

يموت حبك داخل القلب مزروع .. واصبر على فرقاك لو ما اطيقه

مالي حب سيرته نوح ودموع .. أجوز منه ان كان كله حريقه

أصبر ولو ليلي قضيته على الكوع .. والقلب عقب الصبر يلقى طريقه

بالقى صريح ماله جذور وفروع .. ما هو بمن هرج المنافق يعيقه

أعطيه قلب من سواياك موجوع .. واحطه بقلبي قصرٍ يليقه