وَ من هُنا.. من قمّة الصمت وْ على هام العنا
واقف وانا..إطلالتي الدنيا الرحيبة..ومن خلفي الظلام
لي قلب ويسكن به حبيبه.. يصحى وينام
واقِف وانا.. إيدٍ تِدِف الليل وإتصِد العتيم
و إيدٍ تِجِر الشمس وحبالي السنا
ويا صوت الأنا العالي... على وَجه الفضا الخالي
أبي صرخة من الأعماق .. تِهز أركانها الآفاق
تِعَلِّمها إني بالحالي.. بعون الواحد الوالي
وِقَفت وْ تحتي هْمومٍ ٍ.. تِغَطّي جْبالها ظْلالي
وانا لْحالي
ولا عمري نطقت الآه..

تِعب وقتي.. يبي هالصوت ويتمناه
أنا الصمت بضجيج الكون… أنا الصبر وأنا المفتاح
وانا الحب اللي شايل حب.. وفي قلبي قلب
وإذا لجله تعبت أرتاح
انا يالضيق انا اللي هناك .. انا الشامخ على شْموخك
انا اللي ما سَعى لِرضاك… ولا يعني لي رْضوخِك
أنا هذا وْعلى خبري… يمِل من طول بالي الهَم.. ولا أهتم
يمُر سيفه على صبري… وَلا أدري… من اللي فينا ينزف دم
وكيف اللي إنجرح مبري… وليش الجارح إتألم؟!
واثاري لمّا تطغى الروح… على الدنيا.. ترد تحيا.. وتتعلّم
ويْا كبر الآه إذا المجروح… في وجه الجارح إتبسّم