قالوا السياسة مهلكة بشكل عام – صلاح جاهين

قالوا السياسة مهلكة بشكل عـــــــــــام و بحورها يا بني خشنة مش ريش نعام غوص فيها تلقي الغرقانين كلهــــــــــم شايلين غنايم .. و الخفيف اللي عـــــام عجبي

قطي العزيز راقد على الكنبات – صلاح جاهين

قطي العزيز راقد على الكنبــــــات في نوم لذيذ .. و بيلحس الشنبات و انا كل عين فنجان مدلدق قلــق صدق اللي قال إن الحياة منابات عجبي

الدنيا صندوق دنيا دور بعد دور – صلاح جاهين

الدنيا صندوق دنيا .. دور بعــــد دور الدكة هي .. و هي كل الديكـــــــــور يمشي اللي شاف ويسيب لغيره مكان كان عربجي أو كان امبراطــــــــور عجبي

يا ملونين البيض في شم النسيم – صلاح جاهين

يا ملونين البيض في شم النسيـــــم لون الحنين و الشوق و خمر النديم ما تعرفوش سايق عليكو النبــــــي تلونوا الأيام بلون النعيــــــــــــــم ؟ عجبي

وسط الحطام اتفرجوا يا أنام – صلاح جاهين

وسط الحطام اتفرجوا يا أنـــــــــام تمثال ملك . و مبوله م الرخــــــام لتنين نحتهم نفس أسطي الحجــــر و كانوا ذات يوم كتلتين لسه خــام عجبي

أهوى الهوى و همس الهوى في العيون – صلاح جاهين

أهوى الهوى و همس الهوى في العيون وبسمة المغرم ودمعه الحنـــــــــــــــون و زلزلات الحب نهد الصبـــــــــــــــــــــا أكون انا المحبوب أو لا أكــــــــــــــــون عجبي

الضحك قال يا سم ع التكشير – صلاح جاهين

الضحك قال يا سم ع التكشيـــــــر امشير و طوبه وانا ربيعي بشيـر مطرح ما باظهر بانتصر ع العدم انشالله أكون رسماية بالطباشيــر عجبي

عيد و العيال اتنططوا ع القبور – صلاح جاهين

عيد و العيال اتنططوا ع القبـــــــور لعبوا استغمايه .. و لعبوا بابــــــور و باللونات و نايلونات شفتشـــــــي و الحزن ح يروح فين جنب السرور عجبي

نقطة مرارة كمان علي مشروبي – صلاح جاهين

نقطة مرارة كمان علي مشروبـــــــــــي دوبها يا ساقي حسب مطلوبـــــــــــــــي طعب الحياة .. مش برضه فيها و فيها ؟ ليالي وردي و نهارات خروبــــــــــــي ؟ عجبي

بلياتشو قال إيه بس فايدة فنوني ؟ – صلاح جاهين

بلياتشو قال إيه بس فايدة فنونــــي ؟ و تلات وقق مساحيق بيلونونـــــــي و الطبل و المزامير و كتر الجعـــــــير إذا كان جنون زبوني زاد عن جنوني عجبي

حتة محارة وجدتها في يوم لقية – صلاح جاهين

حتة محارة وجدتها في يوم لقيـة قالت لي شوف كيف الطبيعة شقية نظرت للكهف اللي فيها و لقيــــت إن الطبيعة كمان لا أخلاقيــــــــــة عجبي

قاعدة قناني الخمر ساكتة و ساهية – صلاح جاهين

قاعدة قناني الخمر ساكتة و ساهية مع ابن آدم في الشبه متناهيـــــــــــة مفيش كده روقان في لحظة تشوفهم و بعدها بلحظه يودوا في داهيــــــه عجبي

يا خالق الكون بالحساب والجبر – صلاح جاهين

يا خالق الكون بالحساب و الجبر و خالقني ماشي بلختيار و الجبر كل اللي حيلتي زمزمية أمـــــــل وازاي تكفيني لباب القــــــــــــبر؟ عجبي

عالجسر فت الصبح تحت الضباب – صلاح جاهين

عالجسر فت الصبح تحت الضباب بين اللي لسه بينغرس و اللي طاب ما اهتز قلبي لنبت طالع جديـــــــد قد اللي ماشي .. وتحت باطه كتاب عجبي

مركب ورق من نفخة تتطوح – صلاح جاهين

مركب ورق من نفخة تتطـــــــــوح ركبتها و الكل بيــــــــــــــــلوح سوحت فيها اتنين و خمسين سنــــه للآن ….. و لا بتغرق و لا تـــــروح عجبي

لولا اختلاف الرأي يا محترم – صلاح جاهين

لولا اختلاف الرأي يا محـــــترم لولا الزلطتين ما لوقود انضرم و لولا فرعين ليف سوا مخاليف كان بيننا حبل الود كيف اتبرم ؟ عجبي

يا وردة قلبي معاكي في الريح لعب – صلاح جاهين

يا وردة قلبي معاكي في الريح لعب لا تعبتي م الريح و لا قلبي تعــــــــب احنا كده : نرتاح في صخب الجنون و في السكون بنخاف قوي و نترعب عجبي

ظهر المسيح الحي علي سفح ربوة – صلاح جاهين

ظهر المسيح الحي علي سفح ربـــــــــوة و نزل بهالة الضي و قعد في قهـــــــــوة بصوا .. تعالوا .. قالوا خليه في حالــــــــه الناس في حالهم يا بني .. مالهمش دعوة عجبي