اي نعم اخطيت واخطائي كثيره
وهذي ماهي مره أولى ولا اخيره
الاكيد اني وانا انسان أبخطي
يالملاك اللي ملاك أحساس حيره

بين قاصد يجرح وما كان قاصد
والمسافه بينهم ماهي قصيره
قدّر اني ما اعترفت الا لأَنِّي
شفتها بحقي قبل حقك كبيره

شفت نفسي وانت عنها منت راضي
واه ياهي كانت بعيني صغيره

كان أوضح شي بالصوره احبك
والندم في نظره عيوني الكسيره

ما كسرني الا زعلك وما قهرني
غير انك للزعل ما جبت سيره
تحكي عادي للأسف عكس اعتيادي
منك في ضروفٍ مثل هذي عسيره

يالله عاتب قول انك مني غاضب
هذا قلبي وهذا شره وهذا خيره
شوف ما بين الثلاثه من ترجح
وأوعدك في كل حال اقول خيره